اقتباس:
المشاركة الأصلية كتبت بواسطة غزال كلميم
(المشاركة 659944)
بسم الله الرحمن الرحيم
مارو بالدجاج المحمر
المقادير
*4دجاجات صغار كل وحدة فيها تقريبا كيلو ونص
*مقدار 3 كليو من مارو ماركة ممتازة
*3بصلات كبار او4
*قزبر ومعدنوس (يكون المعدنوس بالزايد)
*زيت البلدية (انا كنبغي نطيب بيها)
*مقدار نص كليو عنب يابس
*واحد اللومي
*4عواد قرفة
*العطرية:ملح ،ابزار، حبة الهيل، خرقوم ،سكن جبير المروزية،
الطريقة
ناخدو طنجرة تكون واسعة باش يتقاد طياب الدجاج فيها..بعدما غسلناه مزيان ورقدناه فالحامض والملح..
ناخدو الخيط الغدائي وربطوه مزيان مزيان ..باش مايهرب لينا وقت نطيبوه ههههههه
غادي نكونو مقطعين البصلة مربعات صغار و الربيع والعطرية .. ماعدا الملح حتى التالي
نحضرو خليط وندهنو بيه الدجاجات المربوطات مزيان من كلشي البلايص ..نعملو الطنجرة على النار حتى ياخد الدجاج شوية الوقت ونضيفو ليه المقدار الكافي ديال الماء اللي غادي يطيب فيه ومن بعد نرميو عواد القرفة ومن 7 الى 10 حبات الهيل وحبة اللومي..الكل عارف ان الدجاج خصنا نوضعوه على الصدر حيت ياخد وقت بالطياب..حتى تفيض الطنجرة ونقصو النار باش يطيب على خاطرو..
اوا ناخدو مارو ..دابا كلشي كيسول على مارو اشنو هو ؟؟
مارو هو الروز ..اوا هانكم خديتو من عندي واحد المفرد صحراوي قح..ماعلينا..
ناخدو مارو ونسلقوه صلقة خفيفة غير باش يسهل علينا الطياب ..بعدما نكونو صلقناه نخليوه يستقطر فشي كسكاس..بعدما يستقطر مزيان نفوروه ..كل مرة كنضيفوه القدر الكافي ديال الماء اللي غادي يخليه مقاد .. الطريقة معروفة..وغادي نخليو واحد التفويرة حتى يطيب الدجاج..
غادي نمشيو لعند الدجاجات ديولنا غادي نقلبوهم على الجهة الاخرى وغادي نزولو الغلاقة متاع الطنجرة (باش متزولش الجلدة )وغادي ناخدو قطيب الزنان..يعني قطيب بولفاف..للمرة الثانية خديتو من عندي مفرد صحراوي قح ..للمرة الثانية ماعلينا
ونعملو ثقب بالدجاجات من الجناب ..
بعدما يطيب الدجاج نزولوه وناخدو ديك المرقة متاعو ونصفيوها من البصلة وعواد القرفة و الهيل واللومي..بعدما تصفى نضيفو ليها العنب اليابس ..ونخليوه على النار منو.. العنب يطيب ومنو المرقة توكح انا خليت الملح حتى التالي باش ذوقو المرقة وتضيفو ليها المقدار الكافي..
ونقليو الدجاجات مزيان ومن بعد نزولو ليهم الخيط ..
ونسيت ماقلت ليكم خصنا ندهنو الروز يا بالزبدة يا بالزيت البلدية يا بالسمن كلها وذوقو ونضيفو كذلك الملح الكافي..
بعدما تفور الروز ...التفويرة الاخيرة
ناخدو القصعة ونحطوه فيها ونسقوه بالمرقة وفي الاخير الدجاجات نعملوهم على شكل وردة..
اوا بالصحة عليكم
وانشالله تكون عجبتكم وصفتي
|
الله يعطيك الصحة وتبارك الله عليك....وصفة رائعة ...وبالاضافة الى انني تعلمت كلمة صحراوية منك
حفظك الله ورعاك ووفقك في كل حياتك ...الله يلاقينا جميعا في ساعة الخير ونشركوا الملح والطعام ...كما جمعتنا هذه المحبة الكبيرة في الله هنا على هذه الصفحات....
ننتظر اقتراحك لاحد الاسماء اختي الكريمة.... |
