|
أيام الدراسة وذكرياتنا داخل الأقسام
السلام عليكم ورحمة الله و بركاته أظن ان العنوان واضح جدا اخواني،اخواتي اذن كل واحد(ة) يشارك معنا ببعض ذكرياته ايام الدراسة فأجمل الذكريات هي تلك التي قضيناها في المدارس حيث لها نكهة خاصة بعض الذكريات جاءت على لسان اصحابها: الاولى: اختي الاكبر مني الى جبدها شي حد وحل معاها والصغيرة فينا درويشة .كان واحد الاستاذ بدا تيقري اختي الكبيرة والعام التالي الاخ .وملي جيث انا تنبان ظريفة مع قصيرة ورقيوقة قال لي باينة لي انتي احسن من خوتك مع من الاول ضربتو على الاجتهاد والاسئلة والاجوبة فرح ما جا فين كمل العام حتى قال لي الى جيتي تقراي عندي العام الجاي نخرج باباك من الشرجم ونقتلك وندخل الحبس وانا فرحاان المصيبة اظرفنا جات لعندو عيط ليها وقال ليها 2 كلمات بدلي القسم ما حملتكش من سميتك .واختي خويويفة عطاتها غير البكاء حتى قالت تبدل المؤسسة خايفة على سمعتها ... انما ما عرفتش مع ذلك كنت تنقرا مزيان .و تنجادل الاساتذة الى معجباتنيش فكرتهم اثناء النقاش ....والله يسمح لي منهم . الثانية نعاود ليكم على الرياضيات و ما ادراك ما الرياضيات ، ما عمرني عرفت كيفاش الناس كيفهموهم ، امشا لي راس الخيط من الاول و بقيت بحال السطل ، كان واحد الاستاذ ديال الرياضيات الله اذكروا بخير متحمس بزاف و كيبغي اقري مسكين و كيبقى يشرح لي ، يشرح لي و انا كنشوف فيه ما كنقشع والو فذاك الشي للي كيقول ، والله الى كنت كنحاول نفهم و لكن حتى حاجة ما كدخل لي لراسي ، و نهار الامتحان ديال الرياضيات كان ديما عندي كحل ، كنجيب ديما ناقص 2 ، فالحقيقة عندي 0 و لكن ديك ) ـ 2 ( حيت كيقول لي خلي الورقة خاوية الى ما عرفتيش و ما تكتبيش الخزعبلات ، كانت سوايع الرياضيات كدوز عندي بحال الدهر و كنت كنطلب من الله غير ما اقولش لي سيري للسبورة حيت كنولي ضحكة فالقسم تذكرت اختي المسكينة كانت عكسي تحب الدراسة و الحفاظة ؛ في امتحان الباكالوريا قالت لها صديقتها : غادي ندير نوي بلونش ، يعني قبل الامتحان لن تنام ليلة كاملة ، اختي المسكينة قلدتها و لم تكن متعودة على السهر ، وسهرت الليل كله تحفظ دروس التاريخ و الجغرافيا رغم صراخ امي و هي تقول لها ان التلاميذ لا يسهرون ليلة الامتحان ، و رغم محاولات ابي دون جدوى ، اصبح الصباح و عيناها حمراوان ، ذهبت الى القسم ، ذاك يوم الامتحان الاخير ، اتدرون ماذا وقع لها !!!! لقد نامت في القسم ، في الامتحان ، و ايقضها الاستاذ المراقب مرتين و كل مرة تقفز مذعورة و بكت كثيرا ، لم تستطع التركيز و الكتابة ، فلا ادري ما كتبته لكن كل ما اعرف انها لم تنجح المسكينة لانها لم تحسن التصرف |
الثالثة كنت تانقرا في السابعة أو كنت داخلة لساعة اللغة العربية إوا كانت معايا واحد البنت فيها الهضرة بزاااااف. ديرونجات الأستاذ. أو هو يقوليها يا الله أبنتي صرفي ليا فعل خرج في المضارع ، أو كونا نيت تانقراو أزمنة الأفعال. البنت على نيتها ناضت أو بدات تاتصرف . الله قالت : أنا أخرج أو الأستاذ قاليها يالله أبنتي سربي سربي أو تايدفعها جيهة الباب تاخرجها. أنا داك الديكور قتلني بالضحك أو بلا هوايا طلقت واحد لالاتي ضحكة. الأستاذ خنزر فيا أو قالي ياك ماتانتي تصرفي فعل خرج في المضارع ، أو مع كنت تانقرى عندو مزيان غير قالها ليا أو ضور وجهو زعما غير نبهني. |
الرابعة في القسم التالت تاني كنت مسؤولة على الخزانة انا وواحد البنت انا كنت مجتهدة وهي كانت كسولة هههه المهم كانت كلفاتنا الامعلمة نرتبو الخزانة اوا وانا كنرتب طاحت من يدي واحد البطة تيال جبس ماتسوى حتى 2 ريال ولكن البنت لي معايا قالت لي ناري اش درتي قفرتيها راه الى عرفات المعلمة راه ماعرفت اش دير ليك وانا خوافة ونية المهم عام عيشاتني فيه هاديك البنت في الابتزاز بكل انواعه نوريها في الامتحان ونقاد ليها التمارين ونعطيها لي بغات زعما منعاودش ليكوم حتى ولاو كيجيوني الكوشمار في اخر السنة جات عندنا المعلمة وقالت لينا انا وياها هاد الخزانة عامرة بالخوى الخاوي رميو عليا هاد الزبل وخصوصا هادشي لي بالجبس راه غير كيوسخ الخزانة .... ناري على شمتة وفقصة بغيت نبكي على عام ديال الابتزاز لي دوزاتو عليا هاديك الجنية |
hhhh
drôle d'histoires merci pour le partage |
الخامسة في قسم الثالت كان عندنا جدول الضرب وختكم ما عندهاش الوقت باش تحفظ فين غادي نخلي اللعب هههه واحد المعلم الله يعمر ليه الدار كان تيضرب لي ما حفض جدول الضرب كنا في االول تنكونو عدد كبير تنتسلخو بيني وبينكم المعلم كان تيحن علي وتيضربني في الاول غير بشوية لانني تنقرا عندو مزيان ولكن جدول الضرب ما عنديش معاه .العدد المسلوخين تينقص حتى بقيت بوحدي واحد النهار جاتنمي الحكرة وكان البرد .صافي عرفت راسي الاخرين غادين يضحكو علي غير قال لي عاقلة مزيان 5*4 واحد الدري قال لي 20 بشوية وااستاذ سمعو وانا نفرح راني جاوبت وهو يقول لي مزيان و 4*5 وقال لي قال ليها الجواب نسلخو وانا نوحل http://www.beautymaroc.com/vb/images/smilies/55088.gif عرفت راسي واكلاها وكلاها وانا نقول ليه شوف راني تنقرا مزيان وانا ما عندش مع الضرب ما بقا لي غير الجدول ديالو راني ماشي ديال الضرب انا ديال الزائد والناقص صافي . الاستاذ هو يتفرشخ بلبضحك وملي بقا تيضحك قلت ليه الحمد لله نمشي نجلس بلاصتي ياك وهو يستسلم .وقال لي سيري اجحا ديال القسم هههه |
| الساعة الآن 03:59 |
Powered by vBulletin® Copyright ©2000 - 2026, Jelsoft Enterprises Ltd
جميع الحقوق محفوظة لمنتديات دفاتر © 1434- 2012 جميع المشاركات والمواضيع في منتدى دفاتر لا تعبر بالضرورة عن رأي إدارة المنتدى بل تمثل وجهة نظر كاتبها