|
الكراب والمعزة: قطعة زجلية
الكراب والمعـــزة. .. كانت الشتا خيط من السما الواد حمل وغابت البسمة طاحت شجرة التفاح غرقت بحيرة تع الدلاح طاحت دمعة الفلاح تفرقت الغنيمة مع السراح تفرقت لجساد مع لرواح تمحى السمق من اللواح تخلط الرعد مع صوت البراح تخلط نبيح لكلاب مع النواح تخلط البرق مع صوارات السواح ++++++++++++++++++++++++++++++++++ علي: مات بوه وامو علي: مات خالو وعمو علي : مات بكرو و غنمو علي: زاد غبنو و همو علي: الواد حكرو و ظلمو خلى لو معزة خلى خنشة ورزة خلى لو النكد والحزة علي: ضعاف لو النظر علي: ضارو الصدر علي: على الخدمة ما بقا يقدر علي: ما بقا مع حد يهدر علي: ولى عايش وحيد فخلوتو علي: كيتوسد معزتو علي: كيفرش رزتو علي: كيتغطى بخنشتو كيفطر بحليب معزتو كيتغذى بلبن المعزة وكيتعشى بسمن المعزة علي: كتوكلو المعزة وعلي كيوكل المعزة دازت عام بش فعائلتو ترزا علي: باقية فيه حزة علي نعل الشيطان وخزا وبغا يشوف الناس علي توحش الناس بدات تضرو المعدة والراس علي توحش اللحم والتغماس توحش القاسح والتهراس توحش مرض الضراس توحش المضيغ والترفاس علي كال: مالي انا فهاد الحكرة نهبز من المعزة هبزة تدوز مدة تشفى وتبرا علي مضى مزيان الشفرة صلى على النبي وقطع الهبرة بدا الدم من المعزة يفور علي حار وبدا يتفتف ويدور المعزة طاحت وبدات تفركل وعلي طاح وبدا تيركل جا الفقيه ذبح المعزة وحلل وكال: هاذ البهيمة حلال تنكل علي بكا - مشا الحليب واللبن مشات الوسادة مشا السمن كيما مشى اباه وامو كيما مشى خالو وعمو كيما مشى بكرو و غنمو وعلي بقا ما مشاش كلاو كاع الناس كلاو حتى الكلاب و لمشاش علي ما كلاش علي ما بغاش كلاو كاع الناس مشاو كاع الناس مشا اللحم ..مشا الراس بقى علي بقات لبطانة بقى علي وبقات دودة و دبانة الذبانة بدات تزنزن علي ضرب لو الناقوس فلودن مشى المدرسة سرق ناقوس وصبن لبطانة من كل منجوس فصلها كربة واللي شاط صندلة الخنشة على ضهرو دارها حمالة والرزة دارها فراسو من الفوق وخوا الدوار ومشى للمدينة للسوق عمر الكربة بالما وبدا ينوقس ويعطي النغمة وتعلم يكول شحال من كلمة: ( المين والمين ، اشرب الله يرحم الوالدين ) ( عندي دواك المغذي، اشرب وعدي ) ( آيتــوب وينوب، ميهه تفاجي عالكلوب ) علي تيبيع الما باش يشري الما....كلة علي تيبيع الما والما دالو بوه وامو الما دا لو خالو و عمو الما دا لو بكرو و غنمو الما خلا لو معزة الما خلا لو خنشة ورزة والمعزة هزها الما والكربة هازا الما المعزة كانت تقطرو الحليب والكربة تنقط لو فالجيب المعزة كان يتوسدها الكربة ولى يفرشها الكربة كتوكلو وهو ما كايوكلهاش شحال من مرة الكربة تقبات بطروفة من رزتو دار لها رقعات بدات الشتا طيح خيط من السما الواد احمل وغابت البسما الناقوس غمق عليه الرعد الكراب قضى عليه البرد الكربة ماتت حية كلشي سرد علي ولى شومور الكربة عمرات تقابي من الكدام ومن اللور .................................................. ..... .............................:018:................ .:blow:.............. :harhar1: |
قطعة زجلية رائعة..........
|
| الساعة الآن 19:49 |
Powered by vBulletin® Copyright ©2000 - 2026, Jelsoft Enterprises Ltd
جميع الحقوق محفوظة لمنتديات دفاتر © 1434- 2012 جميع المشاركات والمواضيع في منتدى دفاتر لا تعبر بالضرورة عن رأي إدارة المنتدى بل تمثل وجهة نظر كاتبها