منتديات دفاتر التربوية التعليمية المغربية - سكيتش هزلي تضامنا مع الاهالي في غزة

:blow:سكيتش :
"أولي على غزة "

"زوجة بوش تحمل قطتها ويلي وهي ميتة ،تبكي وتنتحب ،وزوجها بوش يقف الى جانبها منفعلا "

زوجة بوش : ويلي ماتت يابوش ،ويلي ماتت ياجورج
بوش : سكتي .دروك اسمعونا الجيران يصحاب ليهم غير كتبكي على غزة .
زوجة بوش : ياوا غزاو فيك العديان ،واش انا شغلي ،هذي راها ويلي ،ياويلي
بوش : انت سبابها حتى ماتت،شحال من مرة كلت ليك ماتخليهاش تفرج على التلفزة
ملي تكون الحرب .
زوجة بوش : ياك انت ديما كتوصيني ،تتكول لي تفرجي على راجلك شوفيه اش داير
ف العالم
بوش : ايه ولكن ماكنت دوري الطبسيل لجهة الشرق بارك عليك غ الغرب اش داك
لديك الجهة
زوجة بوش : اويلي .ياولي راني عيت وتلف لي ***** فين ما دورت التلفزة تنلقى الصباط
كيخبط ،تكول التلفزات دخلوها الخرازة .
بوش : بلا معاني . ويلي ماتت وانت هي السبب ،اش غدي نكول للعالم ويلي ماتت
بالفقسة والغدايد ديال الحرب .غدي يضحكو علي .
الزوجة : خاصك تصدر بلاغ وتعلن الحداد
الزوج : ياك باش يكولو لي راني متضامن مع البراهش ديال غزة
الزوجة : ياواإ غزاو فيك العديان ياوجه الصباط ،بقيتي تابع العفريتة ديال رايس
والنجمة ديال داوود حتى خركتي صباط فوجهك ،هذي راهاويلي ،راها ملكة القطوط ديال العالم فاهم ولا لا
الزوج : حدك ثم ،خصني نفكربعد باش نفسرللعالم سباب الموت ديال ويلي عاد نعلن
الحداد
الزوجة : لا لا مايمكنش نصبر واش بغيتني نموت بالغدايد حتى انا ،هذي اهانة
الزوج : اجي نخبيوها ف الثلاجة حتى تفوت الحرب وديك الساعة نديرو ليها عزااكبير
الزوجة : اويلي ياويلي ،علا بلمكلخ علاه شحال بقى ليك فهذا البيت ،انا بغيت عزا ملوكي ،
نفقس بيه هذوك الملوك ديال العالم كله ،بغيت العزاية الكبار ديال لعالم ايجيبوا
السكر و البرامل ديال النفط بغيت نكول ديال الزيت .
الزوج : ايه راه واخا نخرج من الرئاسة ،راني غدي نبقى رئيس أمريكي سابق
الزوجة : سابق لجهنم ،هذه رها ويلي ،ماتت ف البيت الابيض ،ماشي ف العراق ولاف غزة
بوش : شفت فمك كيتحل بلا قياس ،راني غدي نجمع مجلس الامن ونفرض عليك
الحصار . ولا نصيفطك لافغانستان ولا العراق باش ترباي
الزوجة : اويلي ياولي ،تدير علي راجل ،وانت حتى الشلاغم ماعندك حكلهم فيك حتى
ضربوك بالصباط.
بوش : الصباط ماكيهمش ،منك تعلمت نخوي على الضربة .
الزوجة : او انت تعلمتي كيفاش تخوي لضربة الصباط ،ويلي مسكينة جات فيها ضربة
ديال الموت .انت هو السبب .
" يرن الهاتف من نائب الرئيس" "يرد عليه بوش "
بوش : الو ،اش كاين نائب الرئيس ؟
النائب : تقارير اخبارية السيد الرئيس
بوش : اش نو، طلق سربيني ،لاحو السلاح ،هزو الراية ؟
النائب : رايات كثيرة ومظاهرات كبيرة
بوش : المظاهرات دروك تطفى بحال الشمعة الحال راه بارد ، كل لي واش غزة تعرات
كلشي فنى اومات
النائب : الا السيد الرئيس .
بوش : او اشنو الافغان اولا العراق .
النائب : خاصك تشوف القناة اكس لادن
الزوجة : اشنوبن لادن فين هو .اولي
بوش : تشد فين
النائب : ياريت السيد الرئيس بغيت نكول ليك شد قناة اكس لادن ،راه فيها المظاهرات
تضامنا مع ويلي
بوش : مساكن بقات فيهم ويلي اوفرقو عليهم شوي ديال الغبرة باش يكتارو الدموع
النائب : اسمح لي السيد الرئيس راها فضيحة .
بوش : اش من فضيحة دوي سربي
النائب : ويلي قبل ماتموت رسلات برقية احتجاج وتضامع القطوط ديال غزة كتحملك
المسؤولية فالانتحار ديالها.
بوش : ويلي انتحرت من اجل غزة
النائب : ايه انتحرت على الموت لي كيتسارى فغزة .
بوش : "يقطع الهاتف " شفتي فين وصلتني المصيبة فضيحة هدي
الزوجة : ويلي مالها ،اش دارت .
بوش : ويلي تلوثات ،بغات تولي فلسطينية .ماكنتيش تدوري الطبسيل جهة الشرق
انا دبا غدي نجمع مجلس الامن ونصيفطها تحرك ف غزة .
الزوجة : اويلي ياويلي ،اويلي على غزة ،اويلي ياولي اولي على غزة امادارت فيا .

نجيب عبد اللطيف

الفقيه بن صالح يناير 2009