العدالة و التنمية باغا تخرج على التعليم العالي…سعدات للنقالة و لي نافخين النقط بالقرار د الوزيرة!
سهام البارودي كود////
تخلعت انا تزعزعت فاش سمعت الوزيرة الجديدة جميلة مصلي قررت إلغاء مباريات ولوج المدارس العليا، يعني من هنا للقدام غايبداو يعتامدو غير على النقط د الباكلوريا و الامتحانات الجهوية باش فلان يدخل و فلان مايدخلش للمدارس العليا !
بهاد القرار كانظن انه تم دق آخر مسمار في نعش التعليم فالمغرب ! علاش؟
حيت بكل بساطة المباريات راها الصفاية الوحيدة لي كاتمكن من معرفة واش داك بنادم قادر يتابع قرايتو فالمعهد و لا لا؟
حيت الباك مابقاش باك ! اشمن باك غانعتامدو عليه باش يدخلو الناس للمدارس العليا ؟ واش الباك لي كايشدو بنادم بالنقيل ؟ الباك لي تسرب للفايسبوك ؟الباك لي يمكن تنفخ فيه النقط د المراقبة المستمرة لي كايشكلو 25 فلميا من النقطة د الباكالوريا يكفي يكونو عندك شوية د الفلوس باش تمشي لشي مدرسة خاصة من دوك المدارس لي خدامين بالبومبا … 6 كاينفخوها كاتولي بقدرة قادر 16 !
اليوم خاصنا نعتارفو انو كاين مشكل كبير فالتعليم ، و بالغاء للمباريات غانكونو كحلناها على المدارس العليا لي مازال فيها شوية د الضو و مازال عندها مصداقية فسوق الشغل …جميع المدارس العليا فالعالم كاتعتامد على نظام الكونكور ،يعني كاتدفع الضوسي ديال الباك و لا تقبلتي اعتمادا على الضوسي كاتدوز الكتابي و من بعد الكتابي راه تقدر دوز الشفوي اذا اقتضى الحال و عاد ديك الساعة كاتعرف راسك واش مقبول و لا لا ! و هادشي راه طبيعي و هو لي كايميز المدارس العليا على الجامعة، و كايخلي للمدارس un prestige ! ايه نعام ا سيدي بريستيج و سمعة كاتمكن الناس لي تخرجو منها انهم يدخلو سوق الشغل بسهولة مقارنة مع خريجي الجامعات ! سمعة اي مؤسسة تعليمية راه كايصنعوها الناس لي تخرجو منها و دخلو لسوق الشغل و بينو على حنة يديهم و بينو بالخصوص ان ديك المدرسة قادرة على تفريخ اطر ذات كفائات عالية و هاد السيستيم باش تمشاو المعاهد و المدارس العليا فالمغرب منذ الازل و خلا لديك المدارس ليوم سمعة كاتجنب الخريجي ديالها شبح البطالة !
اليوم لا حيدنا الكونكور و خلينا النقط د الباك لي اصلا مشكوك فيها غانكونو هرسنا المدارس العليا و فتحنا الباب على مصرعيه قدام المدارس الخاصة لي كاتنفخ النقط و غانزيدو نشجعو النقالة على النقيل حيت غايعرف انو ماكاينش حاجز بينو و بين المدرسة العليا من غير الباك و ديك الساعة ارى حالك للغش على اعلى المستويات… فاش تحيدو للمدارس و المعاهد العليا الكونكور غير قولو يا رحمان يا رحيم على التعليم العالي
الانتقاء ضروري ! ضروري نختارو احسن التلاميذ و اذا اقتضى الحال الاحسن فالاحسن ! و الاوعر و الاذكى و الاكثر ذكاء … و نوفرو ليهم الظروف المثالية د القراية باش المدرسة تنتج اطر عندها كفاءة و قادرة تزيد بالبلاد القدام … باراكا من تبخيس الشواهد ! و تبخيس التعليم ! مايمكنش اي واحد يدخل لمدرسة عليا ! مايمكنش يتساوا واحد قراي ضارب تامارا مع واحد غشاش خدا الباك بالنقيل و الدور د الدولة هي انها تحمي هادا من لاخور و تجازي الاول على تامارتو ماشي تحسسو انو فحالو فحال النقال و الغشاش و لي شاري النقط بالفلوس …
طبعا هاد الهضرة ماغاتعجبش الغشاشة و النقالة و الاتكاليين !و طبعا غايخرج بنادم الفاشل لي كايبرر ديما الفشل ديالو بالعوامل الخارجية يقولك” الكونكور فيه البيع و الشرا و باك صاحبي و ولاد الشعب ماكايقراوش فالمدارس العليا و كاينة الزبونية و المحسوبية و …” ! اسمع مزيان ا السي ! المدارس و المعاهد العليا ليوم عامرة بولاد الطبقة الفقيرة و المتوسطة! 90 فلميا لي كايقراو فمدارس التجارة و المهندسين و المعاهد من ولاد رجال و نساء التعليم و الموظفين و البوفريا د البلاد ! و لكن وليدات لي ضربو تامارا و قراو و بغاو يوصلو …و ماوقف معاهم حد ! و ماعندهم حد من غير الله ! مايمكنش نتا ا سي الفاشل تبغي تخشا بيناتهم صحا و زطاطة… حيت بلاصتك ماشي معاهم !
يعني لي بغا يدخل لهاد المدارس خاصو يكون كايستاحقها و لا يتسوخر و يخلي بلاصتو لبنادم لي يستاهل…