اختيارات العفش كتير أوى! بتتنافس شركات الأثاث والمعارض فى عرض أكبر قدر من الأفكار المتنوعة لفرش بيتك وفكرة أنك محتاجة تستقرى على العفش المناسب ليكى بين كل الاختيارات والأفكار المبهرة دى، فكرة مرهقة؛ علشان كده
موقع بروبرتي فايندر جمعلك مجموعة من النصايح المهمة اللي هتفيدك خلال رحلتك.
1) تحديد المساحات:
حددى حجم العفش اللى محتاجاه حسب مساحات كل حاجة عندك سواء حجم الصالة والأرضيات والغرف أو حتى الستاير والسجاد. لازم يكون فى تناسق فى أحجام العفش مع باقى ديكورات البيت.
لو مساحة البيت صغيرة تبقى محتاجة قطع أثاث صغيرة أو من زجاج.
2) نوع الديكور:
ازاى تحددى ستايل الديكور بتاعك يكون كلاسيك ولا مودرن؟ برضه حسب مساحات بيتك.
البيت الواسع تقدرى تعملى فيه ديكورات كلاسيك من غير ما تأثر على مساحات بيتك لكن لو بيتك مساحته صغيرة يبقى الأنسب ليكى، الديكور المودرن.
3) الميزانية:
مينفعش تسيبى اختياراتك هى اللى تحدد ميزانيتك وإلا هتلاقى تكلفة غرف معينة أثرت على غرف تانية ممكن تكون أهم بالنسبة لك فلازم تبدأى بتحدييد ميزانية لكل غرفة قبل ما تشترى.
4) الألوان:
ألوان العفش بترتبط بشكل كبير مع ألوان الحوائط علشان يحصل تناسق فى الديكور. الألوان الفاتحة بتدى احساس بالبهجة والسعادة فى البيت وبتزود الاحساس بالاتساع وعلى الجانب التانى الألوان الغامقة معروفة بالغموض والرقى والجمع بين الحالتين ممكن يحصل بتحقيق التناقض بين ألوان الحائط والعفش.
5) اشترى المفيد ليكى بس:
ممكن قطع أثاث كتير تكون عاجباكى أوى بس مش مفيدة لبيتك سواء بسبب حجمها أو خاماتها أو ألوانها الغير مناسبة مع بيتك. لو قررتى تضيفى القطع دى مع باقى العفش هيحصل عدم تناسق بديكور البيت.