[أبو المعاني]

أنا حراز.......إيه أنا حراز.
نسد على ولادي باب الدار
مايشوفو لا فار ولا جار..
مايقيسهوم غيار..
ولادي عندي عزاز.. وعليهم أنا ديما حراز..
كاين اللي يقول هذا متخلف.
ولا جاهل كاع ماكايعرف..
نقول ليكم أنا كلامي كلام صريح ما فيه مجاز..
أنا حراز....وغادي نبقى حراز..
مااااانشك فولادي ....عارفهوم ولاد الأصل.
لكن خايف يضصر عليهم شي باسل..
وحيت أنا طبعي حامي. وكيف كاتعرفو حراز
دغيا غادي نبدا معاه فالدباز..
أو نقدر نقتلو أو نشعل فيه الغاز..
وباش نبعد من الصداع...
نخلي ولادي مايبانو كاع...
سمعوا وتيقوا يا حضار.
وخا أنا راجل مغيار
ودمي سخون وفوار..
منين كاندخل للدار...
نولي أنا عبيدهاما نبقى من لحرار..
وتولي مراتي هي لالة و مولاتي
ونولي أنا خديمها وباش ما أمرات نطيعها...
واللي طلبات نجيبو ..
وخا فالتلت الخالي نصيبو ...
ما نكون معكاز
وخا أنا خراز...
هذي خصلة ورثتها من جدودي
معقول ديما وصادق فوعودي..
لكن عيوني عيون الصقر ...عيون الباز..
ديما عساس ديما حنزاز..
حيت أنا حراز..
شحااال الغيرة كتقتلني..
تكويني وتشويني..
وخا ولادي يشوفوشي راجل غير فالتلفاز..
دغيا نقفز ونطفي داك الجهاز....
أنا حراز ...طبعي حراز...
كاين اللي يقول مشى زمان الحراز..
انت غير راجل خرماز...
نجاوبو أنا حراز..
نغمة حفظها مافيها نشاز..
وتيقوا بيا وخا يكون عندي 100 سنة وداير نظاظر وعكاز..
نبقى مغيار وحراز
هذا طبعي حراز وغادي نموت حراز
قولوا بااااااااااز