أعيد نشر هذه القطعة الزجلية التي سبق نشرها من قبل.
يقول أبو المعاني المجذوب الجديد :
******
طْـوال البُنْيان فبلاد العربان
الله واعلم قربات الساعة
.......
النسا ماتعرفهوم كاسيات ولا عاريات
وتمشي فالشارع بخلاعة
........
الغلمان المحسوبين على الرجال
نافسو النسا فالغنج والدلال
الرجلة ضاعت ببشاعة
........
لرحام تقطعات...ما بقى غير لغوات
ولحديث المزوق والضحكة الخداعة
........
فات الفوت ...ها لعداوة بين الخوت
ما جمعهم لا دم.. ولا رضاعة
.......
كلا يقول راسي يا راسي
كثر لغدر والقلب القاسي
مشات مشات لقناعة
.......
ولات الماكينة تهز... ولعشور يخرج بالزز
يا حسرة على أيام الكاعة
........
كثر الزواق...كثر الطلاق..كثر النفاق
والبركة قلات...جات المجاعة
.......
الناس تشغلات بحب المال
مايهمهوم لا حرام ..ولا حلال
مشى حب الخير للجماعة
.......
ماسمعوا أذان...ضحك عليهم الشيطان
فين...فين السمع وفين الطاعة