شعر الزجل

[يحي]

ما رأي الاخوة في فتح المجال للشعر العام الهادف؟

[يحي]

بْعدْ اللْطافَة وْالطْــبْعْ الصَّــــــافِي
تتقْطعْ دَاتِي بْسْكِّــــينْ حــَــــــافِي
ايَّـــــامْ الشْتَا دَازْتْ
مَا ضْمنْتْ غلّة،مَا عْمّرْتْ مْطافِي
النَّاسْ بْ لهْنَا فازْتْ
وَانَا حَالِِي ضْناهْ مَا عَــــــادْ خَافِي
لعفُو لنَاسْنَا تلفُو
نْرجَاوْ مُولْ لعْفُو يْعـــَــــــــــــافِي
........................................
شْحَالْ مْنْ وَاحْدْ نْوَى لِي لْغدْرْ
سْعَى لفنَايَا وْصْعَابْ عْليهْ تقْطَـافِي
شْحَالْ مْنْ وَاحْد هْدِيتُو لعْمْرْ
نْسْعَى لرضـَــــــــــــاهْ،وْهُوّ يْجَافِي
دَاريتْ الحرقَة بْحْلاوةْ لْحْرُوفْ
وْقطفْتْ وْردَة مْنْ جْـــــنَانْ لقـْـوَافِي
جْنِيتْ منّو عْنَاقدْ وْقطُوفْ
غْزلتْ مْنهَا قصـــَــايْدْ لضْـــــــيَافِي
زِينْ لْخْصَال عْلينَا يْطُوفْ
فْ بْردْ لعـْــــــــــــشِيّة بْكويِّسْ دَافِي
خبيثْ لفعَالْ غَايْتو يْشُوفْ
صْخر لقهـــْــــــرْ مْثــــــــــقّل كْتافِي
بْنيتي بْ طُوبْ لْوهْم قْصُورْ
جَا رِيحْ خْفيفْ،بــــــــــــَــانتْ لفيَافِي
الدّنيَا كِيفْ النّاعـُـــورَة تدُورْ
بْعدْ لهيبْ جْمرْهَا يْعــــُـــــــودْ طافِي
حْوالهَا سَايرَة بينْ ظلامْ وْنُورْ
جُورْهَا بينْ سْطُورْ لُوقــــَــــاتْ غَافِي.

حميد عسيلة_سيدي افني

[مواطن شريف]

شكرا لك اخي الكريم على القصيدة الجميلة واليك قصيدتي لكن بالدريجة

قراوني واليديا وخسروا الفلوس عليا
بغاوني نكون شان او دكتور
او في يدي العمودية
حتى انا بغيت نخدم ونخف الحمل
عليهمم غير شوية
ساعة ماكينة لا خدمة لا ردمة
ولا قنبة تفكنا من هاد الدنيا
جمعت ساكي وحركت بلا مانقولها لوالديا
ولقيت بوعزى وحميد وبراهيم
في العروبية السبليونية
حكاولي قصتهم مع الغربة ومصدقت ودنيا
خدمت سرباي نسربي الناس
وحادر عينيا
عشت الدل والمرار وقصاوة العنصرية
تمنيت نرجع لبلادي ونرجع
لاحضان والديا

[يحي]

قصيدة مؤثرة أخي مواطن.
مرارة الغربة و هجر الاوطان قاسية.
بلادي و ان جارت علي عزيزة**** و أهلي و ان ضنوا علي كرام

ننتظر مزيدا من شعرك الجميل

[مواطن شريف]

ان شاء الله اخي الكريم يحي وانا في انتظار باقي المشاركين في ابراز مواهبهم الفنية وشكرا