وعدت الأخ ادريس في ردي على زجليته علاش بالرد بزجلية متواضعة..في نبذ الظلم والحقد..وهي رسالة لكل نمام يسعى لفراق الأهل والأحباب...فهي مهداة لكل الدفاتريين والدفاتريات عامة .ورواد الدفتر الأدبي خاصة....
بغيت نسول
بغيت نسول أحضار وللجواب كنتسنى
علاش النمام على بنادم عزيز ولكلامو كيصغى
احكي ليه فالكذوب وبودو كيتهنى
ولي يسعى فالخير بالقهر والحكرة كيتجزى
وقلبو الحنين بنيران الظلم كيتكوى
وللي يسول عليه طول النهار كيتسنى
هجروه الناس وخا عليهم فالشدة ما يتخلى
ايقدم ليهم ما عندو ولوصالهم كيترجى
نوصيك ادريس خلي قلبك للأمل يتمنى
عمر القلب ما يموت إلى كان بالإيمان كيتغذى
بالمحبة عامر وعلى الغير ما يحقد ما يتعدى
وللعذاب لي جا مشمر على دراعو بالصبر يتصدى
والأفراح والأحزان لي تجمعنا عليها ما نتخلى
بغيت لي يسعى بيني وبين خوتي بالشر فحياتو ما يتهنى
وخا تظلمت أنا نصبر ولفراق حبابي ما نتمنى
نطرق أنا باب خوتي وخا قدمي من الشر تدمى.
وبذرة الشر ليها نحارب وما نبغيها تتقوى
للخير أنا نزرع وبصبري نرعاه حتى يتنمى
ونطلب الهداية للي بين الناس بالشر تيسعى
وعرف بلي حنا خوت وحتى حاجة ما تفرقنا.
تحيات ام عثمان
27_04-2009_
بغيت نسول
المواضيع المتشابهه
