قصيدة زجلية بعنوان : عيد لكــــــــبير

[mahmohokamma]

عيد لكــــــــبير

العيد ما بقاتلو غير ايامات قليلة

والمسكين تالف وحيران ما لقى لو حيلة

سوق لغنم شاعلة فيه النار

والثمن غالي وكايكوي

وولاد الدرويش فالدار

ايحلموا بحال الناس بكباب والمشوي

الزمان قاهرو الزغبي ومذوق لو لمرار

وفكل اعشية حشمان ايدخل بيدو خاوية للدار

النهار أو ماطال وهو يضارب مع القوت

وشحال من مرة اتمنى لراسو الموت

لعل وعسى ايتهنى من دنيا غدارة

مابقى ينفع فيها لا اصحاب ، لا وليدات لا خوت

الحولي ياناس ايبعبع فكل مكان

ها واحدعند الصاحب ها واحد عند الجيران

شوي من عند كل واحد تخليه حتى هو فرحان

كيفاش ايكد عليه لمدوز العام كلو معري وجيعان ؟

فين انسانيتك يا ذاك الإنسان ؟

وكانتعجب لي ايكول ديما : العام مزيان ؟

النعيجة تاهية دارت لكرون

وتغوت وتصيح : شكون فيكم لي ايكد علي شكون ؟

أما ياناس المعزة والعتروس

ايكولوا لي بغانا ايجبد لفلوس

ولي ماعندوش كلامو مسوس

ايمشي ايقلب لو على شي عتوكة ولا فلوس

أما الحولي لمليح ، دافع على الدرويش كبير

ما يكد عليه غير مول الخير والخمير

وشارط : لهدية بالغيطة والبندير

ايضل يحلم بيه لكبير والصغير

شاغل عقول و قلوب الناس

ومرض شي وحدين بالتقليقة والوسواس ها لي مات بالفقسة ، ها لي تطرطق لو عرق فالراس

ها لي خارج ايبيع فحوايجو ،ها لي ما بقاش ايجيه النعاس

ها لي طلق مراتو لي مكلفاه فوق طاقتو

ما كثير فيها غير لبخ والوش

كالتلوا مني شافتو :

الناس شاريين لحوالى وانت جايبلي مش

وفرمشة عين تريب كل ما بنى طول حياتو

وتشتتت أسرتو وتهدم ذاك العش

الله ايحد علينا لبلى والباس

ويطيح شوية الرحمة فقلوب الناس

عيد لكبير، يا عيد لكبير، الأكثرية فاهمين السنة بالمقلوب

ناس ماذا ايديوا فيه من معاصي وذنوب

ها لي يكول : مالي أنا على هذ لغلا ؟

نتفارض مع شي وحدين ونشريوا لينا عجلة

ها لي طامع ايدي ديال الناس فالغفلة

الشناقة من جهة ، وال****ة من جهة

ما فقلوبهم لا شفقة لا رحمة

ما يرحموا ما يخليوا رحمة ربي تنزل

ما يتهناوا ويرتاحوا حتى يشوفوا الدرويش وحل

ايزيدوا فعذابو ومن هذ الدنيا الفانية بالفقسة يرحل

ليك اللهيا الدرويش، ليك الله

ليك الله يالدرويش ، ليك الله

ولي دار شي خير فهذ الدنيا

غدا يلقاه

ولي نسى خوه

ربي ينساه

ليك الله ، ليك الله ، ليك الله

ليك الله يا الدرويش ليك الله (3) .

كلمات : مــــحمد مــــــــحبوبي

البيضاء بتاريخ : 16/12/2007 .

[tijani]

أحسنت أخي
زجل جميل وواقعي
افكار جمة متناثرة هنا وهناك
خيال خصب وقدرة على التعبير
انت تمثل مشروع زجال قادم بقوة

تحياتي

[ouhtimohamed]

شكرا على القصيدة .

[mahmohokamma]

اقتباس المشاركة الأصلية كتبت بواسطة tijani أحسنت أخي زجل جميل وواقعي افكار جمة متناثرة هنا وهناك خيال خصب وقدرة على التعبير انت تمثل مشروع زجال قادم بقوة تحياتي

أخي الكريم " tijani " ، السلام عليك ورحمة الله تعالى وبركاته .
باديء ذي بدء ، أحيي فيك مرورك الكريم وتعليقاتك الطيبة آملا أن أكون عند حسن ظنك بي .
ألا يقال بأن الشاعر ابن بيئته ؟؟؟ كذلك الخاطرة التي بين يديك ، فهي تعبير عن المرارة التي يشعر بها كل محتاج وكل فقير في غياب الحس الإنساني لذى العديد من الناس الذين شغلتهم الدنيا بزخرفها وانشغلوا بدورهم عن المغزى العميق الذي تحمله هذه المناسبة الدينية من معاني سامية يتجاهلها الكثيرون .
فكانت الخاطرة تعبيرا صادقا عما تعانيه الطبقة المسحوقة ، ولكي تسلط الخاطرة الضوء على هذه الظاهرة الغير صحية ، عسى أن توقظ الهمم وتحث المشاعر للعودة إلى مبدء التكافل والتآزر بين المواطنين قاطبة .
مرة أخرى أشكر ك جزيل الشكر .
لك كل الود .

[الاطلسي.]

أظن أن البيضاء قد أنجبت زجالا مغربيا يلامس اللحظات الحرجة من حياة الإنسان .
بالتوفيق إن شاء الله