الرعدةالدايمة
اسكت انت ماتهضرمازلتي صغير حشم واسمع واحفظ بلاتفكير ماتعطينا راي ما تحتجشاي
ولا دواك راه ساهل للسمطا راك تستاهل
كبرالدري مسكين قرا ماقراوه بلا فهامة
خايف من السمطة الهدامة
كبر الدري مسكين ساكت ما يهضر
يترعد الف رعدة ويتقشعر
يلا جا دورو فالكلام
الأفكار فراسو ما تعرف تخرج
خايف يغلط خايف يتحرج
دار على لسانو سمطة
السمطة تقطعات وترمات
مادارو سمطة جديدة
غير القديمة دارت الفايدة
الدري مسكين مرعود تيخاف
كيفوا كيف الخراف
جابوا لو حل جديد
اسمع وردد كلامنا لا تفوت الحد المرسوم
ولا يصبح كلامك قبيح مذموم
تستاهل عليه اللوم
نفصلوا لك سمطة جديدة ونعسوك علحديدة
الدري مسكين فرح وقال
كنت ساكت اليوم نتكلم
نقول ما بغاو حسن ما نتبكم
ماكاين باس الناس ماشي هما الناس
فيهم الفار ولد الفاراللي ديما يبقى حفار
وفيهم السبع ولد السباع
اللي دغيا صيتو داع ولا نجم عالي
اللي فكر يوصل لمكانوافحلمو يبانو السماطي
عرف طريقك يا خروف لا تخرج من القطيع
الذيب حاضي لجناب وانت ما معاك كلاب
قول ما بغينا وراك عزيز علينا
سير فطريقنا هكذا تمنينا
الدري مسكين تحلو عينيه
واسمع اخبار جيرانو لبعاد
لي عندهم بنادم مقاد.لا راعي لا قطيع
كلشي فميزان واحد
حب يغير جلدو ... قال نهرب عندالجيران
اللي سدو عليه البيبان
رما راسو فالبحر!!!تمنا للشط يوصل
يا حصرا عليك يا دري
لمصيرك ما كنتي تدري
الحوت اليوم راه شبعان
لحمك ليه وجبة لذيذة
ما ربحتي فلوس ما شريتي حديدة
بكيتي عليك الوليدة
قطعتي عليك الكبيدة
يا حصرة عليك يا غلام
الرعدة وقلة الكلام
والسمطة وضرابيها القدام
والحق المسجون فالظلام
قتلوا ولادنا وكبادنا
شردونا فبلادنا
ايمتا نفيقومن المنام ؟؟؟ ايمتا نفيقو من المنام؟؟؟