[tadlaouia]

قالو سيادنا الْوَالاَ.........

درْجة بدرجة

ومَا تقطَعْ الرْجَا

حَطْ همك فالله

وْديرْ الخيرْ فينْما جَا

أخْدَم وادْمَرْ ولآ تنسى

بذكر الله القلب يتْفاجَا

قطرة بقطرة يعمر البحر

وخطوة بخطوة توَلي شي حاجة

**********

قالوا سيادنا الوالا

بنادَمْ يا كْحَل الراسْ

يا خايبْ الطبيعة

اللبسة لبسة المسَلمينْ

والقلْب فيهْ الخْديعة

يَدْ شادة السُبْحة

ويد شادة القْريعَة

كُن بنادَمْ يصَفي قلبو

نوَلِيو كُلْنا خوتْ هاديكْ السْويعَة

وما يتجمعوا علينا عْدَا

وما يفرْقونا كِي الوزيعَة

*****************

قالوا سيادنا الوالا

دير الهمْ فْ الشبكة

شي يطِيحْ وشي يبْقَى

شِي همو الفلوس

ويجرِي جْرا الوحوش

وداها غير فالشْقا

وشِي مَرْضو كثارْ عليهْ

حتى شداتو الضِيقة

وشي قْتلاتو الغبينة

لا مال ولا جاه ولا وْجَه يَتْنَقى

كْتارْ الهَمْ ف الدنيا

وكلشي نسَا يومْ اللقَا

هاد الدنيا غير دارْ البَلا

ما خَصْ بنادَمْ يديرْ فيها تيقة





بقلمي تادلوية