[aborayaan]

قالوا كثرة الهم تضحك
قلت منين تخرج الضحكة
واخا تضحك واخا تبكي
لا ودن على من تشكي

هذي حكاية مسؤول
على التعليم جا يحكي
وداير راسو فاهم
واخا فبيروه ديما متكي

حقر الأستاذ تحقير
وبغا يردو جوكير
يقري ويعس
يشرح يكنس
وعلى القسم يدوّز الجير

ويلا كان قسمك عريان
غطيه بالميكة مزيان
تحيد عليك القطرة
ونحسبوك حنا فنان

ويلا الشرجم مشقف تشقيف
حسب عندك التكييف
دمك ديما يبقى بردان
تكون فايق مشي نعسان

ولا القسم ماعندو باب
وفيه يباتو الكلاب
ديرهم عليه حارس
وصبر شويا لتكرفيص

شبغيتي بشي سبورة
عندك فيها غير الضرورة
قريهم بلا ما تكتب
راه العلم محفوظ فالقلب

التلميذ مفحالوشاي
والأدوات معندوشاي
كون بيه رفيق وحنين
وعليهم ماتحكرشاي

وخا يغيب على طول العام
غير دفعوا يزيد القدام
خليه يكبر بلا تعلام
ويهني راسو من التخمام

شهدوا ياناس را المعلم
هو اللي مضيع التعليم
وجدنا ليه كل مايحتاج
وهو معوج تعواج

لحقوق ولادكم مضيع
قالّك في النضال مضلع
دايما مطالب بحقوقو
يا خوتي ما تايقنع

هدكشي اللي مطالب بيه
انتوما اليوم أولى بيه
تيقوا بيا أيا حضار
را المعلم إنسان مكار

الناس سمعات وتاقت
وعلى المعلم دغيا فاقت
وعليه اليوم راها حكرات
كثرو عليه خبار الصلخات

القنوات الرسمية
عليه اليوم راها حطات
تقلب لو عل الزلات
وتديعها في كل وقات

داروا للناس سور حادر
لقات بعدا علاش تظّاهر
واخا على ولادهم ساهر

بعداوتو كلشي جاهر

من لنتخبات لنتخبات
ينشطو بيه الحملات
على الفرعيات يكثرو اللجنات
قالوا إصلاح التعليم