[aborayaan]

مراتي الحبيبة



نهار شفتك يا لحبيبة
زيانة ليّا ليام
طلبت قربك يا لكبيدة
خديتي وقت لتّخمام
ساعا قاسك نار الحب
ودغيا كَْلتي نعام

عند هلك دقيت الباب
وعجّلت بالطلََب
كنت عليك ملهّْف
خديت بكل الأسباب
شافوني والديك
عرفوني تانبغيك
داروا فيا لامان
قالوا لي هيَ ليك

يوم عرسك
درتو عيد
كل عام يدوز
حبي يزيد
زينتي داري
بْوْلِيد
معاه بديت
عمر جديد

يا مراتي الحبيبة
حنانك عليا نعمة
طاعتك تاج
فوق راسي
زادني شان وهمة
ولّي زاد حبي ليك
هو رضاك بالقسمة

ديما واقفة جنبي
مفاجيا على قلبي
البسمة على وجهك
ولحزنك تخبي
مرتاحا في قربي
يخليك ليّاربي

معاوناني على ديني
يلا غلطت تنهيني
ولا أذن صوت الفجر
فنومي ما تخليني

على ولدي سهرانا
تفيقْ ونْعس انا
عمُّرْها ما تكَول عييت
ولا تبان زعفانا

تفرح لي بحبابي
وتكرم ليّا صحابي
لّي تعرفني تانبغيه
تبدل مجهود
باش ترضيه


يا ربي يا مولاي
حقق ليا رَجَاي
كرمني بالجنة
ومرتي تكون معاي