[مرآة الروح]

يا التيجاني ربي يهديك
المرا فخيالك ماشي هديك

حل عينيك زول الضبابة
اللي حكاوا ليك كلهم كذابة
المرا زرع سقيتيه يعطيك
تعاملها بجفاف راها تسطيك

وصفت كاسها بكاس المرار
ومازال ما جبت زين لخبار
كاسها للحبيب شهد مقطر
من حلاه يرشف بلا ما يعبر

يكفيها معاه تحس بالأمان
ترفد الدبيلة وامحاين الزمان
من بنات حوا عزل زينة المنبت
رزينة، فبيتك تحصن وتثبت

فالباب تلقاك بسمتها وضاحة
كيالما الڭليل تهزك فكفوف الراحة
تربي الولاد ولمالك صاينة
تحضي غيبتك وخرجاتها باينة

ب اهلك تفرح، تضايف وتهادي
لغلطاتك تغفر،ما تكره ماتعادي
العيالات اصناف أيا التيجاني
عرفت واحد، لا تعمم بلعاني

حكايات النسا دروب مفرقة
اللي تزوجت وطولت، ولا المطلقة
الناس كيقولوا البيوت اسرار
بين المرا والراجل المولى ستار

شوف خاي أمين بالنسا مرفق

فاهم الطبيعة، رواها ومصدق