آ السي التيجاني اسمع نوصيك
و على الحق لا تغمض عينيك
أمك مرا، اختك امرا ، وخالتك و عمتك
و مولات الدار اللي تواتيك
حتى هي امرا.
المرا بلسم لجراح
إلا لقات راجل ديال بصاح
و انا بغيت نفهم
واش عندك دماغ بحال الناس
ولا عندك حجرة تم.
واش اصباع لليد تتشابه؟
را عهدي بيك على بال و منبه
و شفتك اعمى و بلا ماتخمم
و ف اصناف النسا تعمم.
صاوب كلامك و اعرف كيفاش تكلم.
المرا را اصناف مصنفة
و الفاهم يهديه الخالق
للعاقلة
ماشي التالفة
آآالسي التيجاني.
را شحال من راجل غ راجل بلعاني
و نكول و بلا معاني
انت راجل غافل ولا كتغافل
واش تقدر تعيش بلا مرا سميحة
و تولي محضار ناقصاه لويحة
و قدام المحضرة تابعاه الفضيحة.
يسراق لواح مفرقة
ها المصلصلة ها المسمقة
ها الناقصة ها المطرطقة.
إيوى افهم كلامي و اروى
و اللي يكول المرا كاس امرار
من حر لهيب هواها تكوى.
طاح ف ذيبة عضاتو
و بنيابها المغروسة ف ضلعاتو
انهش ب كلامو امرا من قلبها بغاتو
ولا يمكن تكون اختو،عمتو،
وعلاش اللا حتى اللي ولداتو؟
أسمعني آالسي التيجاني
محال واش كلامك هذا
تكون دايرها غ بلعاني
حيث شوفة ف صورتك مخطوفة
وراتني طيبة القلب
و محبة للناس ف العين مكشوفة.
لا تكابر يا راجل
را شي رجال غ مهازل
و لا كنت واحد منهم
را ما بقاك ف الهم حاصل..
27-05-2009