التيجاني يا حضار
اخوا المزيودة بلا تحزار
ع المرا بدا يتشرط
و بغاها قال ليك ما تْفرّط
اللي حرة ما تقبل
تعيش مبهدلة فهاذ الذل
تمثال ما يتمتم
وف المرار؛ يزهى ويبتسم؟
تطيع وما تتحدى
وبلا شوك؛ كيف تكون الوردة؟
إيلا بغيتِ ترتاح
خاصك تكون كريــم وملحاح
تلويحك بالدبزة
يَخْلي الدار ويقــادي المعزّة
وتهديدك بالضرّة
يكْسَر القلب واتحرار العشرة
الغالية ماترخاص
تهدي روحها كاملة بلاتنقاص
للحر اللي يستاهل
مايهينها لبيب ب نَخْوتو كامل
بالاحترام تبادلو
يكسبها وكيف السلطان تعاملو
قيمتها من قيمتو
يكبّر بيها؛ تْعَلِّي شانو وهيبتو
قالوها اللوالا
الشطايري يتقدى ف السوق مرتين
والراجل التالف
يتزوج مرات وبالطلاق ديما حالف
يطيح فاش يخاف
التالية ليه شربة الثور العياف.