السلام عليكم ورحمة الله تعالى وبركاته .
أخي الفاضل : " زايد التجاني " تحية طيبة
فنزولا عند رغبتك الكريمة ، ها أنذا أرد على قصيدتك الزجلية : ( مكلوم القلب ) ، أتمنى أن أكون قد أفلحت ولو بعض الشيء في محاولتي هاته ، ومعذرة على تأخري الخارج عن إرادتي .
يا مكلوم القلب ، يا خويا التجاني
حالتك طيرات النعاس من عياني
وبت انتهته وحدي ونحكي للنجوم ماكواني
يا مكلوم القلب ، يا مكلوم القلب
قول لي ياخويا آش بغيت عندي
وادموعي كي الويدان سالت على خدي
الجرح ، الجرح لي تتكلم عليه
الجرح راه ماشي واحد ، راهم جروح
هذي ضربة بدمها ، هذي كلمة بسمها
والجراح لي تقول عليها برات
نذوبها كل ساعة تفكرك فدمها
راه شي ناس فزمانا كي الوحوش فالغابة
ولو يكون خوه ....ياعجبا!!!
كل واحد منهم كيفكر غا فراسو
ما هامينو احبابو ولا ناسو
مستاغل امصايب الناس وداير منها اعراسو
ياك نبينا وصى على عاشر جار
لي كانت فيها الجورة بالصح
واليوم ما كثار فينا غا التبركيك
نضلو انمضغوا فسيرت جيرانا
واخا امشاركين معاهم الملحة والدكيك
الله يصلح من حالنا ويسمح لينا على فعالنا
وتموت بالحسرة والغبينة عليها
راه الناس فهاذ الدنيا كلها معادن
كاين الرخيص فيهم وكاين الغالي
وما عالم بالقلوب غير ربي لكريم العالي
ها لي ثمانو اغلا من الذهب والجوهر والماس
ها لي ارخص من الحديد والقصدير والنحاس
والناس هما الناس هكذا حالتهم ديما
ها لي الزغبي واصلة فيه لعظم
ومكمدها لقلــــــبو وصــــــــابر
وها لي عاطياه الدنيا بلا احساب
وضحياتو معمرين السبيطارات ولمقابر
خصك صبر أيوب إلى اتبليت بيه
لي ما عندكش معاه ، وكان براني عليك
تدخل لدارك وتسد بابها عليك
ولي عايش فيها وفقاعها معاك
وريني يا الفاهم كي اتدير معاه ؟؟؟
كي اتدير تقطعها وتسمح فيها ؟؟؟
كي اتدير اتعيش بلا بيها ؟؟؟
واخ اتبات وتظل اتخبي على الناس فيها
المرض ، المرض مايتسنى ما يرحم
لي حاروا فيها موالين لعقول ولفهام
ما تنفع معاها حتى شي حيلة
كثرت التفكير فيها يهرس الهام
هذا هو واقعنا المر ، ماشي خيال ولا اوهام
كثرت التفكير فيه اتزيدك سقام على اسقام
ويلا كان ايهمك وايعنيك رضاه
غادي تصلهم ولو على حساب رضاك
إلى نساوك احبابك ربي عمرو ما ينساك
شوف شحال من ورطة طحتي فيها فحياتك
وخرجك منها الجاه العالي سالم غانم
ما احنا غير اعبيد ضعاف بين ايديك
طااااااالبين رعاااااااايتك وحمااااااك ....
كلمات : محمد محبوبي .
البيضاء – بتاريخ : 30/10/2008 .
رد على مكلوم القلب .
المواضيع المتشابهه
