الميريكان ايصنعوا الجناوا
والصهاينة لكزارة ايذبحونا بيها
ماغيعرفوا الكزارة بمضاوت سلاحهم
شلا مجازر ومذابح دازت على فلسطين
والعالم واقف ايتفرج عليها
الصهاينة احتلت لينا لوطان
ما نجم من حقدها لا نسا لاشيوخ لاصبيان
ما خلات نسفات الكهربا والما
ولي بقى فينا حتى حد من لكنا انعولوا عليهم
ما كال يندد ويستنكر بشي كلمة
ما بقى فينا لا الأمم المتحدة لعلى هذ الجرايم معمية
ولا حتى الثمنية لي يكولوا على راسهم اكبار
مصالحهم وحدها علاش كيدافعوا
احنا لعرب ولمسلمين لمشعلين فبلاداتنا النار
فبرجهم العاجي كي سيادنا يعطيونا الأوامر
وماعلينا غير انفذوا بذل ومهانة واحتقار
ولي يقطع القلب ويبقى بزاف فالخاطر
ناسنا ، دياولنا لمعانا فقاع الدار
معولين عليهم يحميوا ظهرنا المكشوف للعديان
خذلونا وباعونا ارخاص للأشرار
وشمتوا فينا ليسوا ولي ما يسواش
وليفسدوا الزمان ما يعالجوا دوا عطار
زمان راسي يا راسي هذا فاش احنا عايشين
لا ليحن فخوه ولا ليرد عليه الضر ولخطار
ارجع يا خويا العربي للتاريخ
من النهار لي اعرفنا فيه الميريكان والصهاينة
وهما مشعلينها فالدنيا احريقة ونار
ما كايهمهم فهذ العالم غير مصالحهم
والغدار ما يتبذل حالو كيبقى ديما غدار
كاين لطالب غير ضيافت الله
وخرج لي ضيفو للزنقة وولى هو مول الدار
ولي ما يقرا التاريخ ومايسول موالين
العرف والعقول ما يجيب لدنيا اخبار
هذاك ما يفهم حتى يفوت عليه الفوت
وعمرو ما يدي من الدروس فايدا
والفايدة ما تصلح غير لغيرو
والكلمة مع الغافل تولي غير زايدا
لسان الصهيون يا خيي العربي راه اعوج
وطبيعتو كي الحية لخبيثة وكحل النية
وفعايلو فخوتنا محارق ومجازرفاقت كل تصور
ووقفات كدامها متقزمة وحشمانة جرايم النازية
طيارات لعدو الخواف تهدم لبيوت على راس ماليها
ياك كيكولوا لقتيلة فالمدنيين جرايم ضد الإنسانية؟؟؟
فينكم يادعاة حقوق الإنسان ؟ فين مهرجاناتكم الخطابية ؟
فين ليتشذقوا بحقوق الطفل ليتقتل اصباح وعشية ؟؟؟
فين الجمعيات لتنادي : بلا للعنف ضد العناصر النسوية ؟؟؟
فين جمعيات الحفاظ على البيئة حتى هي ؟؟؟
وجمعيات الرفق بالثروة الحيوانية ؟؟؟
وفين جمعيات الصليب الأحمر الدولية ؟؟؟
وفين شفتوا لبلاد لي تشهر الفيتو عمرها كانت ديموقراطية ؟؟؟
وفين ....... وفين ...... وفين ....
الله يكون فعون ذوك لمساكين .
*** الصهاينة للبنية التحتية
قتل جماعي لأرواح بريئة مدنية
والأمم المتحدة مثمنة هذ لفعايل وحتى لكبار الثمنية
وعلى راسهم الميريكان سباب الشر ولبلى
وزيد عليهم بعض الدول الغربية
وهذا لخلا لعدو يطغى ويتجبر
ويطيح فحبابنا ذبيحة وقتيلة
وما بقى لو غير يكول أنا الله أكبر
شوفو يا لخوت هذ القوم المعمية
ما نجم منهم لا إنس لا شجر و لا طوب لا حجر
ولميريكان توعد وتهدد شعوبنا اصباح وعشية
شكون لي كال ايجي يوم لي العربي فيه ايتحكر
وأملي فالله كبير بلي غايجي النهار لنعيشوا فيه احرار
وترجع لينا الهيبة لي ضيعنا والهمة والشان
هذي حماس ولي معاها من المقاومين ، اعطاونا خير قدوة وامثال
بلي فئة قليلة من الرجال صادقين العزم و النية وشجعان
بمقاومتهم الباسلة ورغم قلة ما فيدهم من سلاح واعتاد
صمدوا فوجه رابع قوة دولية ، كيف ما اجرى فلبنان كيجرى دابا في فلسطين
ولقنوها درس قاسي وصعيب وداروا فيها غزاوة
مصاب كون عند الجامعة العربية جيش من هذ الشبان العربان
و مجهزين بالسلاح ولعتاد لي مشري بلملايرومكركر فبلاداتنا
عمر شي حد ما يتجرأ علينا ولا شي حد منا يتهان
أرضنا ما تستعمر وخيرات بلاداتنا ما تنهب
وكيفما كالو اللوالى : "حفنة نحل ولا شواري ذبان "
حفنـــــة نحــــــــــــل ولا .............
