ياما كلتها ليكم يا لعرب ياما
سياسة ميريكان ما اتغير مااتبدل
ديما كالفاس طايحة فالحيوط الضعيفة هدامة
وفين عمركم يالعرب شفتيو الذياب ترعى لغنم ؟؟؟
وفين عمركم شفتيو الباز اتخاو مع شي احمامة ؟؟؟
إسرائيل النازية هي المحضية عند الميريكان
وانتوما يا لعرب ردوكم قلالين لعقل و لفهامة
ما تقراو التاريخ ما تستافدو من دروسو
وما حادكين غير فالخصومة والدابيز بيناتكم واتباديل لملامة
ضاعت هيبتكم بين الشعوب وضاعت جرأتكم ومعاها الشهامة
وضاعت عزت النفس فيكم وضاعت معاها النخوة
ويا خوفي عليكم تكون ضاعت هاذ الصفات ليوم القيامة
وضاعت معاها حقوقكم بين لنذال
كيفما كاتضيع حقوق الضعاف و ليتامى
حتى حاجة ما مخبية ، كلشي واضح وباين للعيان
غير لي بغا منكم على الحقيقة ايتعامى
ويخشي راسوا فالرملة من الخلعة والخوف
ويظن إلى ما شاف الصياد ما يتشاف كي دارت النعامة
وياما كلت ليكم هاذ لكلام يالعرب ياما
ياما كلتها ليكم ياما ، ياما، يااااما
قرا التاريخ وتشوف بلي لبلادات
لي دازو منها كلها صات فيها الريح
قتلو ولقتيلا انواع ولي ما تقتل بالفقسة مات
مابقى ينبت فأرضهم لا زعتر لا شيح
مغامرين و محابسية جاو لميريكان
ودايرين السبة بلي راهم غير تجار
وبلي راهم ناس مسالمين كيتاجرو
فجميع السلاعي وحتى الطين والفخار
ايبيعوا فيها وايشريو بالليل وبالنهار
بالذهب الصافي وكريم لحجار
والطمع كي كالوا لوالى طاعون
غدرو الغدارة بمالين لبلاد لخيار
وبعدما كانو التجار غير ضياف عندهم
والباقي بلاوه بالحشة وشرب لخمار
وتهمشو لهنود وغرقو فالهم والغم
حتى ما بقاو جايبين للدنيا اخبار
تعاون الصهاينة العنصريين على الجور و الظلم والعدوان
وتشجعها بلا حيا بلا حشمة بهدم لبيوت على ريوس السكان
وياما ذاق الفلسطينيون على يدها من عذاب ومحان
هذي ستين عام ومازال يعانيوا منو حتى الآن
دايرة فيهم حقل التجارب بحال إلى راهم فيران
ما توقر منهم لا نسا لا شيوخ ولا صبيان
دمهم الطاهر ايتسفك كل يوم وقدام لعيان
وبرعاية وتشجيع من الغرب وعلى راسهم لميريكان
وكايمدوها بالسلاح العصري وكل ما يخطر عل لذهان
من سلاح فتاك ممنوع الاستعمال ديالوعلى جميع البلدان
وبالخصوص فلبلايص لي كثير فيها المدنيين من السكان
آش من قنابل فسفورية و آش من ضام تفتك بالبشر كي الذبان
جرايم وحرايق فحق الفلسطينيين يشيب لبشاعتها الولدان
وفالوقت لي الغرب عازم النية على منع تهريب السلاح لغزاويين الشجعان
ميريكان راعية السلام كاتصيفط السلاح العصري للصهاينة بالاطنان
كيف دارت ميريكان مع السكان الأصليين من لهنود ذاك الزمان ،
كايديروه الصهاينة للفلسطينيين موالين الأرض هذ الزمان
وحضي راسك يا خويا العربي من لميريكان
ايبيعو لضعيف النفس بلادو بحلو اللسان
بيعة ابليس الملعون للغافل من الإنسان
ايبيعوه لي قدامو ولي وراه ويخليوه مرمي كي الكلب جيعان
ويصيفطوه للجايحة خاوي الجياب مكرد وعريان
وفيق يا خويا العربي واحضي راسك مزيان
وااافيق من الكلبة بارك ما اتذل واتهان
ونوض اتحزم يا الغافل توكل على الله ونعل عليك الشيطان
ودير ايديك فيد خوك وتعاونوا على مرورية هذ الزمان
واياك ، نوصيك ، واياك تعول على سياسة ومعاونة الميريكان
راها سياسة كلها غدر وخديعة وما فيها ثقة ولا أمان
ولي ابقى منكم غا حال فمو، راه فمو غا يدخل ليه الذبان
ونوض يا خويا العربي ، اتحزم ونعل عليك الشيطان
وتوكل على الله وحده سبحانه لعزيز لكريم المنان
ودير ايديك فيد خوك وتعاونو على مرورية هذ الزمان
إلى بغيتو ترجعوهاذ لمرورية بمذاق الشهد والعسل فاللسان
وتحزمو وكفضو على جلايلكم باش تحولو صحاريكم جنان
ولا غا ندوزو عمرنا كلو يشربونا العديان
كيسان عصير الحدجة المرة والدفلة والكطران
وعمرو قلوبكم يالعرب بالخاوة الصادقة والتقوى والايمان
وتوكلو على الله سبحانه وحدو خالق لكوان
راه لبني لمقيوم بالنية الصادقة والعمل المزيان
ما عمرو ما يطيح فيوم من ليام على ريوس السكان
ما طيحو رياح عاصفة ولا بحور هايجة ولا غدر عديان
يبقى صامد قد ما طال بيه الزمان فوجه لعقايب ولمحان
وربي صادق وعدو مع عبيدو لحرارالصادقين العمل والنية
ما يخيب ليهم رجا ما يخسر ليهم خاطر وحاجتهم عندوديما مقضية
البيضاء بتاريخ : 25\01\2009 .