الحال
لقلم حدَّاد
الورقة رحبة الجحاد
الحرف مسخوط
وقَّف الكلمة و زاد
خيمة بلا أوتاد
منها هارب المعنى.
الحرف خو لَحروف
الحرف من قبيلة لحروف
ما مليوح ف بير
ما مفدي بخروف.
الحرف طوبة ف حيط
مبني بالصوف
مضرَّﯕ عوّاد
ف واد
تيقطَّر الكلمة ف لقداح
يعيش الليل و يموت ف الصباح.
الرزانة دير صوره عالي
و العقل سجان غليظ
أنا حماقي غالي
و الخاطر عيَّان مريض
ف الرزانة موتي
بالحماق نعيش
جواد
جامح
مسرَّج بالحكمة.
الجوع قوتي
الغناء غوتي
نقايض النعسة بالسهاد.
الحافر ف الماء
و المزنة
علاَّفة ف السماء
عامرة ب العناد.
الذيل من الريح
اللجام حزام مراة
ولَّا ثوب ضريح
راقد من ايام عاد.
الحال حوال
حالي ما يشبه لحوال
واحد بالماء الطايب برد حالو
واحد ﺑﯖﺪامو شحَّر براد.
واحد سلخ ثعبان كالو
واحد بلسانه طفا الجمر
وْ سَفْ الرماد.
واحد شاف الدم هدى باله
واحد على خده خيط لعقاد.
الحال حوال
حالي يانا ما يشبه لحوال
ﯕﻮلو التسليم
عيني مبرقة ما تقشع
ﯕﻮلو التسليم
وذني مْكَيلة
حالفة ما تسمع.
ﯕﻮلو التسليم
ذاتي تسجد
قلبي ما يركع.
ﯕﻮلو التسليم
العافية ثوبي
ﯕﻮلو التسليم
ف رزمة تنجمع النجوم
ونحزمهم بالغمام
ﯕﻮلو التسليم
تنكوي لفهامة بريوس السهام
ﯕﻮلو التسليم
تنوقف النشبة للفجر
ونصيد الظلام.
ﯕﻮلو التسليم
تَنَخْصي الديوك
ونحط للدجاج بيض النعام.
ﯕﻮلو التسليم
أنا. . .
تنشرب المداد
تننفح لقلام .
ورزازات 06/2004
المواضيع المتشابهه
