هدا سلامي
للي يفهم كلامي
للي صال او جال
فهاد بلاد الهبال
هاد الناس تحب تركع
ضحكها وبكاها متصنع
تحب تطيع وتسمع
هداك لي نام
او ما قام
هداك لي خاف
وتخبا تحت اللحاف
قالو راه كيناضل
واللي ما عرفو غافل
هزوه فوق الكتاف
غناو او كترو تخراف
دارو فالصندوق
مستقبل مشنوق
وقلبهم مدبوح
بالامل والطموح
هو اطلع للسما
او هما بقاو تما
قالو راه يناضل
واللي ما عرفو غافل
تسناو من السنين سبعة
لا خدما لا لباس لا شبعة
تمناو من رب السما
يبدل الجفاف بالرحمة
او يتفكرهم مول الكلمة
يطل عليهم ولو فلحلمة
فاقو سادين عينيهم
او جا اللي حلهم ليهم
وراليهم الصورة والرمز
او واعدهم بالهمة والعز
دارو فالصندوق إمامهم
او فجيوبهم ثمانهم
او رجعنا لسنين النعاس
الله يحد الباس.
الله يحد الباس...
المواضيع المتشابهه
