أعيد نشر هذا الزجل لكونه اختفى سريعا عند اختفاء منتدى دفاتر في المرة الاخيرة ..وكذلك لأشحذ قريحة الاخ محبوبي لعله يتحفنا برد اجمل وامتع .... بالتوفيق
قلبي مكــْلومْ
راه ْقـلبي مكلومْ بْـحَـرّ الدنـــــيا مــكروبْ
مشـى المعقـول اليوم ْأجا مْـكانُ الـكـذوبْ
نـْسا وارجالْ تخـلطوا ،وْ كـلـشي مقـلوبْ
كـْثرْ الخصام ْأجْفـّاتْ مالـمْحـنـّه القـلـوبْ
الحق بينـّا متروكْ ..ألشـرّ خـِيلُ مركـوبْ
الحق ماليه ْشْروقْ أ ُلضّيمْ ماليهْ غـْروبْ
الحق حسابُ مغـْبونْ ، وغربالُ مثـقـوبْ
النّـْفـاقْ عْلامُ مرفوع ْ،واحْــكام ُمرهوبْ
البا طلْ مْكـَشّـرْ نيابُ وْكا سُوا مشْـروبْ
إشرْبوه ْالناسْ، وِِِِيـقـولوا هـذا مكـْـتوبْ
راهْ قلـبي مكلـوم ْ،بْـحـٓرّ ْ الدنـيا مكروبْ
هـذا زمـانْ الطغـيانْ ألفـسـادْ أ ُلحـْـروبْ
ما بقاتْ حشْمَه الواحدْ معـْيابْ أٔمَعـْيوبْ
هْـنا مسكين حـالُ احـْوالْ ِديــمَ مـغـْـلوبْ
غْلاتْ اللقمَه بزﱠافْ والخيرْ كـلّ منْهوبْ
أهناكْ شـفـّارْحالُ مَسْرارْ دِ يمَ محـْـبوبْ
بْحـَرّ الدنيا، قلبي خْلا ني دَ با مجـذ وبْ
بْنادم ْ عـقـلُ مشْـطونْ أ ُلـسانُ مسْلـوبْ
وبنادمْ اليومْ حالُ مرتابْ ديـمَ مــزْروبْ
رجْعاتْ السْبُولـَ بَـغـْشى ما فـيهْ حـْبوبْ
راه ْعمرْ بنادمْ عــند الله ْكُــلّ مَحْسوبْ
أ ُيـُومْ الحسابْ جايْ ، بهْـوالُ مرْعوبْ
نـفكـرْ فىْ يومْ العـــذابْ لِما ليهْ هروبْ
رْجايَ فاللهْ ،ما نكونْ عليﱠ مغـضـوبْ
إغـفرْلي وما نـكونْ منْ ظـلّ مشْطـوبْ
زايد التجاني / بومية |
المواضيع المتشابهه
