الغابـــة والحطابــــة .
راسي بين يدي
وعقلي تايه مع النجوم
والغصة فحلقي
والقلب مكدرو مضيوم
كيندير يا ربي فما جرا لي
حتى انرجع حقي
فهذ الزمان المشؤوم
ازمان ما يرحم
غير زايدين هم فهم
العاقل منا مابقى يفهم
ايرجعوه احمق إلى تكلم
ولا المظلوم ظالم
والظالم مظلوم
بحال إلى عايشين فغابة
الشجر فيها قل من الحطابة
ولا ليغرس منهم شتلات لا ليزرع بذور
حالتهم ولات حالة
مايمكن اتوصف بكليمات ولا ايقدوها سطور
ازمان هذا واش من ازمان فاش احنا عايشين
كثرات فيه لقوام الكذابة
بعدما كانت لفضايح انقيطات اتحولات لبحور
القوي ياكل الضعيف ولو يكون خوه ...
ياعجبا !!!
لا خاوة صادقة فهذ الزمان
لا محبة بقات فالقلوب
تجمع عباد الرحمان
فين ريحة السوسن والريحان
فين شذاها لي كان ايعطر كل امكان ؟؟؟
ما بقى بين الناس
لا ثقة ،لا أمن لا أمان
ولات الحياة بيناتهم بطعم القطران
ما كاين غير لكذوب فلكذوب
ولا المغلوب فيهم غالب
بفلوسو والغالب مغلوب
كلشي ايخلي الحق و الآجر وراه
ويتسابق لمعاصي وا لذنوب
حق الضعيف واليتيم
ولامهضوم ومسلوب
خفف يا ربي
ما جرات به لقدار والمكتوب
وارحمنا يا رحمان
يا غفار الذنوب
لا ملاذ لينا سواك
لا مفرمن حكمك لا هروب
انت عالي وعالم بسر عبادك
يا علام الغيوب .
محمد محبوبي .
البيضاء . بتاريخ : 13/07/2005 .
زجل بعنوان : الغابــــــــــــــــــة والحطابـــــــــــــــة
المواضيع المتشابهه
