لقـــــوام الحكــــــــــارة .
شافوني الحكارة فالخدمةحادر عيني وحاني الراس
ما فاهمينش بلي السبولة واخ محنية بخيرها وقوي ليها الساس
كالوا فنفوسهم دغيا نكركبوه وانغبروه علينا ويتساس
وانبيعوا بلاصتو ليدفع لينا بلا حساب وبلا قياس
ماذا منهم باغي غير يوصل ولو يكون على حساب وتعاسة الناس
هكذا شي ناس فالحرفة لاثمارة فيهم لامشاعر لا إحساس
واش كاين فهذ الدنيا شي فلاس اكثر من هذ الفلاس
ما عرفوش بلي لحمي مر ما يتكل ليهم بالساهل ما يتقاس
بحال الطير الحر ما يرضى يكون سجين لقفاص
ما يرضى بالحبس ولو يكون مرصع بالياقوت والماس
انفضل انعيش على الكفاف والعفاف والغنى عن الناس
والى تمدات يدي لماشي لي
نحكم عليها بالقطيع ولا التهراس
وبلي واخ ساكت وصابر على لما يعجبني
راني قوي الشكيمة وشديد المراس
وغير بالكلمة الصادقة انحاربهم
وياما كانت الكلمة اقوى من المدفع والرصاص
ناس واش من ناس
ما عندهم من تاإنسانيت غير السمية
اتبلينا بهم فهذ الخدمة الطاهرة ،لارقيب عليهم لا عساس
انحاسي غبرتو فنقيرة صافية ،
ولقوام الحكارة تبقى مجرد صدى على النحاس
الناس الحرة تبني فوطانها ولصروحها تعلي
والحكارة يهدموا ما بناو سيادهم بلا عتلة بلا فاس
مني اينعسوا الناس لبالهم مرتاح ومهني
كانتعجب كيفاش ايجي الحكارة النعاس
احفظنا ياربي وقنا من شرهم
انت عالي وعالم وحد علينا لبلى والباس .
محمد محبوبي
بالبيضاء بتاريخ :16/07/2005 .