نصيحة من مريد إلى شيخه
شيخي يالطالب
مني ليفاده
خايف نفسي
تعجبني
وناخدها عاده
يخالف كلامي
فعالي
نركب البْلاده
ويضيع النوم
من عيني
تضيع السعاده
كيف نفيدك يا شيخي
نبدا منين
حرت وتحيرت يا مولاي
دمعات العين
ولكن منِّي سبق الكلام
اوّعد الحر دين
لازم نوفي يا سيدي
ونكون رزين
نطلب ربي يوفقني
يرزقني التمكين
سيدي مولاي
مراتك ديرها
بين العينين
فرّحها
صباح وليل
بالكلام الزين
وخّا تقلقك
دعي معاها
وكَول آمين
بها سيد النبي
وصاك تكون حنين
شيخي مولاي
عامل ولادك
بحال بحال
تكون عليهم هاني
يرتاح البال
تزرع بينهم
محبة ماتْباع بمال
يبقاو ديما يد وحده
يهدو لجبال
شيخي مولاي نوصيك
حسن بالجار
تنعم بالخيرياسيدي
تعمر لك الدار
ستر عليه عيوبو
لاتكون غدار
وشفع ليه لاغلط
وكون صبار
عليه يجازيك ربي
فهذيك الدار
مجالس السوء
ياسيدي
غير خويها
لاكْلستي
مع السودور
عينك تعميها
ولاترْكن للكافر
عليك يجور
ولاتصاحب غافل
تولي مغرور
تشوف راسك عابد
تنعس مسرور
عليك ينصب الشيطان
تولي مجرور
شيخي حرص عل لسان
دير عليه لجام
قلة الكلام يا سيدي
راها وِسام
سمع وتدبر يا شيخي
ووزن الكلام
الكلام الموزون سيدي
مايجيب ندَام
كون كريم يا شيخي
لاتبخل بمال
راه الدنيا فانيه
مهما العمر طال
تملك القريب والبعيد
لْكُل عليك يسال
صفي النيه ياسيدي
يزداد المكيال
شيخي نوصيك لابغيتي
تعْرف ناس الخير
عاملهم بالدرهم
القناع يطير
لي قلبوا على الدنيا
يبان شفيفير
لا أمنتيه على مالك
رميتيه في بير
لاسولتيه يكَول ضاع
آش ندير
شيخي نوصيك عل كتاب
ديرو صاحب
نهم حروفو ياسيدي
عيش تْجارْب
غوص فعماق بحورو
تعرف غرايب
سيدي مولاي عل كتاب
كون حريص
راه الكتاب فالدنيا
خيرُ أنيس
ينمي لعقل
ويْنعش الأحاسيس
الكلام كثير ياشيخي
هرب مني
العين ما تعلا عل حاجب
غير عذرني
وعدي ليك بليفادة
راه جبرني
راني طالب عاد بديت
نحفظ ثمْني
يلا قصرت فكلامي
لاتهجرني